أمام التطور السريع لعدوى فيروس الكورونا في البلاد التي تجاوز عدد الوفايات فيها 5 آلاف شخصا من جميع الفئات الاجتماعية و العمرية، خرج الاطباء منذ مساء أمس السبت 9 جانفي 2021 للإعلام للكشف عن حقيقة ما يحدث في المستشفيات و عن قرارات صادمة حيث بدأوا باختيار من يقع ايواؤه و من لا يقع ايواؤه في أقسام الانعاش المكتضة.
و على نفس الوتيرة، قام الدكتور سهيل العلويني مستشار المنظمة الدولية للصحة بتونس بنشر اليوم الأحد تدوينة تحسيسية على صفحات التواصل الإجتماعي قال فيها ما يلي:
“معلومة مهمة و يبدو انها ما وصلتوش للناس الكل على ما نشوفو فيه في الشارع و في الإعادة إفادة: فما فيروس اسمو كورونا #SARSCoV2 عندو عام منتشر في العالم و مرضو بيه حد اليوم 90 مليون شخص و توافاو منو الى حد الساعة قريب زوز ملاين نسمة و مازال يدور !
وراهو موجود في #تونس و ميش كذبة و لا اشاعة كيما يقولو بعض الناس .
و عندو مدة بدا يعمل في عمايلو فينا برشا قاعدين يتعداو بسرعة و السبيطارات تعبات و الكادر الصحي تعب و بدينا نودعو في اصحابنا و اقاربنا الي وافتهم المنية بسببه الله يرحمهم و ينعمهم و يصبر اهلهم .
الخطر محيط بالجميع حتى الصغار في العمر و بالاخص الناس الي عندها #السكر و #الضغط في الدم و #السمنة و #ضعف المناعة.
جيتكم بجاه ربي احميو رواحكم و الي عزاز عليك نلبسو #الماسك #الكمامة و نشجعو صاحبنا و اقاربنا و حتى نتغششو عليهم الذي ما يحبوش يلبسوه نطبقو #تباعد_جسدي و #غسل_الايدين #الصابون #الجال نبعدو على الاماكن #المكتظة
راهي ارواح قاعد تغادر فينا و اكبر سبب هو اللامبالاة و الاستهتار لان الفيروس راهو ينتقل من شخص الى اخر . صحيح الي الموت حق و كل واحد ساعتو اما راهو ربي قال في محكم تنزيله:
(مِنْ أَجْلِ ذَلِكَ كَتَبْنَا عَلَى بَنِي إِسْرَائِيلَ أَنَّهُ مَنْ قَتَلَ نَفْساً بِغَيْرِ نَفْسٍ أَوْ فَسَادٍ فِي الأَرْضِ فَكَأَنَّمَا قَتَلَ النَّاسَ جَمِيعاً وَمَنْ أَحْيَاهَا فَكَأَنَّمَا أَحْيَا النَّاسَ جَمِيعاً)
صدق الله العظيم .
ولكم سديد النظر #Covid19tn”
شارك رأيك