في الحوار الذي أدلى به يوم أمس السبت 11 سبتمبر 2021 لبرنامج Samedi Light على موزاييك أف أم التي أعادت بثه اليوم، قال المخرج السينمائي عبد الحميد بوشناق ان طريقة تعامله مع وسائل الإعلام من هنا و قادما ستتغير و سيطالب بمستحقاته ان تم استدعاؤه و ذلك في صورة ان كان له الجديد …
محتوى الحوار كانت فيه جرأة لم نعهدها بتونس، هي ثورة ثقافية و ككل ثورة، الآراء متباينة. اخترنا تعليقات لبعض الفنانين و الاعلاميين:
**** جهاد الشارني:
“لأول مرة في تونس يتكلم فنان مبدع و يطالب
شكرا عبد الحميد و مالك خاطر مثلث النار (الفنان ، الاعلام ، المستشهر) لازم يتحكى فيه و يتعاود و يتبدلو حاجات خاصة أصحاب القرار او على الاقل اذواق أصحاب القرار
………………………………
*** مكي هلال في رأي برأي مع المخرج Abdelhamid Bouchnak وبكل احترام وصفر قباحة.
ما قاله المبدع عبد الحميد بوشناق صحيح جدا وشجاع وموضوعي لكن بربي هات ننظروا للمسألة من جميع زواياها من أجل تكريس مبدأ الاختصاص شوية والتنسيب الضروري… الممثلين والمخرجين يبعدوا شوية رجاءً من التحكك على الصحافة والتنشيط والتقديم الإذاعي والتلفزي…
ناس قارية صحافة ومختصة قطعت أرزاقها وفرصها خاصة في الإذاعات بسبب موجة نزوح الممثلين للإعلام بل الهجوم عليه ، ومستعدين حتى يخدموا بلاش موش كان يطيحوا السوم، اعطيه فقط يمد وجهو والإسم يبقى يدور والمربوح مبعد مادي ومعنوي في عروض مسرحية أو أدوار درامية ، سود وجهك ولي فحام، عفوا إعلامي أو كرونيكور بلا تكوين أو دراية أو خلفية (اللهم الخلفيات التي تعرفونها) أو حتى ثقافة عامة يا رسول الله !
نعم الممثل والفنان من حقو يخلص كي يجي ضيف ويحظى بكل الاحترام الواجب آما زاده الممثل ممثل والإعلامي اعلامي والمخرج مخرج والصحفي صحفي والمذيع مذيع واللحاس لحاس، يهديكم…
أقول قولي هذا وعلاقتي جيدة بكل الممثلين والمخرجين فقط من باب الإنصاف ورفض المنافسة غير النزيهة ولدعم الاختصاص ورفض تداخل الأدوار، يا تمثل يا تقدم يا توخر في الزوز ولا تنجح لا في هذا لا في هذا…
تحب تولي إعلامي مرحبا بيك فقط اتعب شوية على روحك وأقرأ أبجديات الصحافة وأسس صاحبة الجلالة(في الجامعات أو اعمل تجربة محترمة في مؤسسات محترمة) موش في دكاكين بودورو تبيع وهم الشهرة وتتحيل على الطامحين والحالمين بالشهرة فقط لا بالصحافة ومجدها ومتاعبها ومسؤليتها الاجتماعية والسياسية في بلد يتعثر في انتقاله الديمقراطي الصعب !
مخ الهدرة :
إذا الفنانين كضيوف ما يخلصوش، الصحافيين يخدموا صباح وليل موش يجيو ضيوف، ويتم التحيل عليهم وما يخلصوش قال شنوه غيرك فنان يخدملي بلاش ويبدا فرحان !
أقول هذا لا من باب التجني أو التحدى أو التعصب لأهل مهنتي من المختصين بل عن دراية تامة ومتابعة دقيقة ونقاشات حدثت أمامي بين مسؤولين وصحفيين وفنانين دخيلين على الاعلام، خلال قوس تجربة مريرة بالإعلام التونسي أغلقته مكرها بسبب اختلاط الحابل بالنابل وتطييح القدر …
الخلاصة :
مع احترامي لكل الفنانين (الفتانين لا طبعا)، والله لو قاعدين يقدموا في قيمة مضافة للمشهد الإعلامي ويزيدوا لمسة أخرى وذائقة أخرى كيما يصير في أوربا وأمريكا ما عندي حتى مشكل، لكنهم فقط يركبون موجة البوز ويرذلون المشهد الإعلامي والإعلاميين الجديين والصحفيين الحقيقين حتى صرنا ننعت كلنا بوه على خوه بإعلام العار، وهو وصف غير ظالم أحيانا…”.
……..
*** فضيلة بن حميدة
انا البارح في الليل سمعت l interview متاع عبد الحميد بوشناق اللي هو مليار في المايه صحيح و السينما و المسرح ،الموسيقى،الشعر ،الرقص الكل اتعاني و صحيح كيما قال ثمة تقنين و موسيقيين و مسرحيين و ممثلين انتحرو علاش خاطر يخدم في العام شهر شهرين باش ايعيش تسعة شهور يا دين محمد لليوم برشا منا موش لاقي باش يشري باكو حليب وخبزه ما نوصلوش نحكيو على انو ايخلص كراء الدار اللي ساكنها ايه هاذي حقيقة موش كذب و الناس هاذم هوما اللي تلقاهم في الخارج رافعين اسم البلاد بأفلامهم و مسرحياتهم و شِعرْهم و كيفاش اتحبوه بزوز صوردي في هالبلاد ايعيش و يعمل الفن اللي تبْلى بيه باش يخرج سي بوبكر بن عكاشه وغيرو من صحافة البلاتوات المايعة إيسبوه شكون السبب في وضعية الثقافة والفنان بصفة عامة، هاو لليوم كل شي دزني واندزك قهاوي، مارشيات،قاعات أفراح، بيران، مساحات تجارية كبرى كان الثقافة امسكرين عليها، بالطبيعة هذا كلو داخل في ساسة وسياسة البلاد باش سي المستشهر ايولي هو اللي يتحكم في ذوقك الفني و يفرض عليك كيفاش تخدم و اشكون اتجيب و ايزيد هو اللي يكتب السيناريو اللي يتناسب مع سلعتو خاطر هو صاحب راس المال و يحطلك سلعة كريم الغربي، نظال السعدي، نوفل ورتاني، علاء الشابي، فيصل لحضيري، العربي المازني،أساور، نرمين صفر، هذوما اللي باش ايدمر بيهم جيل كامل و ايقلك هذوما المثقفين و السينمائيين و المسرحيين و الفنانيين متاع تونس و هكاكا تولي قمح و قشور فول فرْد شكاره و ايقولك يا ولدي ما ثماش ثقافة في البلاد اشبيكم ماكمشي كيما هوليود و مصر تخدمو كان في حاجات من رمضان لرمضان و كلها اتحشم، ايه يا سي بوبكر بن عكاشة انا حسب ما نسمعك في برنامجك ميدي شو ماكش من الاعلامين متاع تدبير الراس وعندك وعي و صاحب مبدأ و مثقف موش متاع بكْلي وهذا رأي فيك حسب سماعي ليك في برنامج (ديما مع احترامنا للبعض منهم) فثمة إعلاميين ساهمو بدرجة كبيرة في تخريب جيل كامل بالرداءة و الميوعة اللي تجيبو فيها خاطركم قابضين فلوسها بالمسبق
انحب انقول اللي الاخراج و التمثيل موهبة و فكرة وثقافة و معرفة و برشا فرجة على السينما والمسرح و الرسم و الخ
و انا مع أحمد الأندلسي في انو الفنان يلزم كيف يمشي لبلاتو يخلص و يخلص و هذاكا حقو موش امزيه و معادش تمشيو بلاش فلوس خاطر حقكم”.
فيديو
شارك رأيك