الكاتبة و الجامعية ألفة يوسف تعلق الاثنين 2 أوت الجاري على حملة العنف اللفظي التي تتعرض لها امرأتان و خاصة الفنانة لطيفة العرفاوي على خلفية اغنية أصدرتها تم انزالها على الصفحة الفايسبوكية لنادية عكاشة مديرة ديوان رئاسة الجمهورية و على صفحة مؤسسة الاذاعة الوطنية قبل سحبها:
“اللي قريته سبان وعنف لفظي في فاتن الفازع ولطيفة العرفاوي ها النهارين وقف لي مخي…
الأولى امرأة تكتب، وعندها جمهورها، تنجم تحس روحك من جماعة الأدب الراقي ومتاع النخبة، انت حر، اما ما في باليش بفاتن الفازع تضرب في الناس بالمشطة باش يقراو كتبها، ما عجبوكش طفيهم ، واقرا اللي ترتاح له…
الثانية تغني، وامراة عطات بارش لتونس ورفعت اسمها عالي وعاونتها باللي تقدر (البعض يعرفوه الناس والبعض ما يعرفوهش)…يتهمو فيها بالتلحيس، نتحداهم يجيبوها نهار لحست للخوانجية…وقت اللي بارش من اللي يسبو فيها عياو يسبحو باسم الغنوشي…
اللي قريته لاهو نقد أدبي، ولاهو نقد موسيقي، هو تعبيرة على واد هرهار متاع كره وغيبة وحقد وبارش حسد زادة…
عبارة حفلة جماعية متاع قبيلة شادين لحم عباد ياكلو فيه ويتبننو ، وكل واحد ياكل طرف ينادي للي يعرفه ويقول له ايجا، احضر، ما تغيبش على ها الحفلة، والبراح ينادي: هاو لحم الناس نيء وفرشك…
وتفكرت خبيرة متاع طاقة فرنسوية حكيت معها من عام 2004 قالت لي قداش ثمة طاقة سلبية في البلاد…
خسارة…شبينا ولينا هكة؟
ملحوظة، أي تعليق فيه سب لهذه أو تلك يحذف فورا…”.
شارك رأيك