.
kapitalis .

صحيفة إلكترونية تونسية إخبارية جامعة.

.

نعته بشاهد زور، العياري للهاشمي: “توة تغلي شوية و ترجع لبيت طاعة سيدك الشيخ و تعطي للذل كارو”


174 Shares

ردا عل اتهام زياد الهاشمي له بشاهد زور على اثر نشر مساء أمس الجمعة 15 جانفي 2021 راشد الغنوشي رئيس البرلمان بيان تنديد لممارسة العنف من بعض نواب كتلة ائتلاف الكرامة على نواب من كتلة الديمقراطية، كشف ياسين العياري النائب عن أمل و عمل المستور و بكل استهزاء… و في ما يلي إجابته عبر صفحات التواصل الإجتماعي:

“من يعنيه ما ينفع الناس، رجاء، تجاوز هذا المنشور، عليك بالمنشورات السابقة، الله غالب، ساعة ساعة، أضطر لمثل هذا للأسف للرد على حاحا!

ناح النواح و النواحة..

إلي يغدرو شيخه الي يلحسله، يجيب حكاية حولة!

شيخك يدينك و الغلطة مني؟

أتفهم وجعك “زميل”.. إن الله مع الصابرين.

تو تغلي و تفلم شوية (هذا فراق بيني و بينك) و ترجع كي العادة تعطي للذل كاره، فالعين ما تعلاش على الحاجب : تو ترجع لبيت الطاعة، لسيدك الشيخ ..كيفما يرجع الفرططو.. للنار الي تحرقه..برم برم

لا علينا،

نجاوبك سيدي :

قال تعالى :

“وَلاَ تَكْتُمُواْ الشَّهَادَةَ وَمَن يَكْتُمْهَا فَإِنَّهُ آثِمٌ قَلْبُهُ وَاللّهُ بِمَا تَعْمَلُونَ عَلِيمٌ”

“وَمَنْ أَظْلَمُ مِمَّنْ كَتَمَ شَهَادَةً عِنْدَهُ مِنَ اللَّهِ وَمَا اللَّهُ بِغَافِلٍ عَمَّا تَعْمَلُونَ”

“وَلا نَكْتُمُ شَهادَةَ اللَّهِ إِنَّا إِذاً لَمِنَ الْآثِمِينَ” صدق الله العظيم.

نعم، قدمت شهادتي للناس و كما سأسأل عليها أمام الخالق.

نعم ريتك رميت الدبوزة.

نعم، الزميلة أميرة شرف الدين كانت بعيدة لحظة إعتدائك الهمجي الحقير المدان على زميل.

لعلمك، أنا من ذهب لرئيس الجلسة و طلب منه إيقافها، كي سال الدم.

إنت و فيديواتك ما ريتونيش؟ لاهي تتجودر و تعنف في زميلك، ماكش مركز.

كنت في قاعة الجلسات، بلاصتي لاصقة بهو الحكومة، سمعت العياط، خرجت من باب الرئيس، عرضتني أميرة شرف الدين في الباب، شفت الحضبة، شفتك رميت الدبوزة! من باب الرئيس إنجم نشوف الكلوار كامل.

موش خاطرك جبان، تعمل عملة و بعد ما تنجمهاش و ما تنجمش تتحمل مسؤوليتك موش خاطرك جبان، يدينك سيدك الشيخ على العنف (للمرة الثانية، الأولى بعد مراسلة البرلمان العربي) فتلوج على أي حكاية تتليفة

موش خاطرني في خلاف مع التيار الديمقراطي

تحبني أكتم شهادة الحق!

و الي شهد إنه ظفر أميرة شرف الدين (إلي ما ثماش) جرح زميل، ينجم أكيد يعطي دروس في “شهادة الزور” أما في إحدى حانات باريس العاهرة ذات إحتفالات 7 نوفمبر مع فرقة شمس الدين باشا للأناشيد الدينية التوب رجولية!

نجيو لبقية الإتهامات،

حكاية الرجل الذي قال لا، 2011.

“عاونتني في إنتخابات ألمانيا” 2017.

معناها كي كنت تعاون فيا 2017، في بالك إلي نختلق في الحكايات!؟

وحدة منهم، أنت منافق، تعلم أني لم أختلق و تكذب تو!

أو أنت منافق، تعلم أني نختلق في الحكايات، أما ما يقلقكش، تساند فيا وقتها.

إختر إحداهما لا فرق! في الحالتين، أنت منافق.

و بالنسبة للرجل الذي قال لا، هذاكا كلام Jeune Afrique موش كلامي.

كلامي ؟ قلت الجيش نهار 6 جانفي ما عندوش أوامر بالتحرك (وكانت معلومة صحيحة و حقيقية موش إختلاق)، بضحك و لعب ردتها الصحافة رشيد عمار قال لا!

رغم ذلك، وحدي وحدي تحملت المسؤولية و خرجت للناس و وضحت و تسبيت و كنت أعلم إني بش نتسب، لكن، كيما قتلك : تحملت المسؤولية. تعرف إش معناها تحمل مسؤولية؟

و زيد الحمد الله ما كذبتش على الناس، قلتلهم بش نجيبلكم البترول و عطيت لجنة الطاقة لعبير، عامين متتاليين!

ما كذبتش على الناس، جبتلهم البوفاس دواء الكورونا و لا لقيتلهم البترول في غوغل مابس.

ما كذبتش على الناس بالثورة و أنا جرد باراشوك للغرياني.

ما كذبتش على الناس قلتلهم نبيل القروي فاسد و صهيوني و أنا متحالف معاه.

نزيدك أو نرحم حالتك يا متع “الإختلاق”؟

أما على الإعتداء السابق : نفكرك إنت بالذات كيفاش جبدتلي عرضي ؟ عندي الكابتور لتو، يا من تعمل live مع وجدي غنيم الي كفر التوانسة، الكلك ورع و إيمان و بعد تقذف محصنات في شهر الصيام (كبائر).

و هذا الكل علاه؟ جيتوني قلتولي إيجا معانا، قلتلكم ما نعملش السياسة مع المدبية، ما نعمش السياسة مع ناس موتورة، تقعر في حلاب الهوية، خماسة عند النهضة، نخير نخسر كل إنتخابات العالم و ما ندجلش على العباد.

عجبتني منك “ماهيش عركتي”، تعرف إنتوما شنوة “زميل”؟

أنتم نسخة من عبير! غير قادرين على بناء أي شيء، غير قادرين على تعريف أرواحكم بذاتكم، يلزمكم ديما “عدو”، يلزمكم ديما “ضد شكون”، “عركة”، تصلحوا كان فصايل!

أتم مجرد فرارات، موتورين، بلا رؤية و لا تصور و لا ما ينفع الناس، كان تقعدو درج بلاش عرك و قلة رباية تندثرو.. و كي تتسكر عليكم و تهزمون و ما أكثر هزائمكم، ضريبات تدجيل تقوى و ورع!

كان ما خالطتكمش و شفت أخلاقكم الحقيقة! صبعين و تلحق الطين يا متع الورع و “دومان الإسلام”!

برى زميل، دور بغافل لا نجبدلك دوسيك! تعرفني لساني موذي، فأخطاك مني و معادش تعاودها، إتلهى في همك و فضيحتك، أصبحتم كالجرب، يتحاشاه الجميع و بعد ما يوفى الفيلم (هذا فراق بيني و بينك 2)، روق أعصابك و برى كبكب على سيدك الشيخ، ماك تعرف اللحم إذا نتان، عليه بإماليه.

على عكسكم، ما نحتاجش عركة باش نعمل السياسة، يكفيني الخدمة و التركيز على ما ينفع الناس.

قطيعهم، الي جاد عليهم، جماعة حمية الجاهلية : مرحبا بيكم، سبوني قد ما تنجمو، لو كان القطيع يتقن غير ذلك، لما كان قطيعا!

ناحت مواويل النواحة

على حاحا و على بقرة حاحا..




اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: المحتوى ملكية فكرية خاصة