الرئيسية » العياري للتيار: ” يا متاع الطهورية، قداش القيتوا من دوسي فساد للنهضة، موش ذنبي عرفوا يسرقوا، انتوما بهايم فيسع حصلتوا…”

العياري للتيار: ” يا متاع الطهورية، قداش القيتوا من دوسي فساد للنهضة، موش ذنبي عرفوا يسرقوا، انتوما بهايم فيسع حصلتوا…”

يبدو أن المعركة اصبحت حامية الوطيس بين ياسين العياري و التيار الديمقراطي وصلت إلى حد التشويه في العلن. و كتب في هذا الصدد ياسين العياري النائب عن أمل و عمل مساء أمس الاثنين 31 اوت 2020 على صفحته الرسمية كلاما فيه الكثير من التجريح ليصبح أصدقاء الأمس اعداء اليوم. كلامه اكثر من جارح بل هو في موقع الهجوم و بأساليبه الخاصة يسخر من حزب عبو ليقول، فبعد “خطاب الطهورية فانكم مجرد حزب، ما كمش مبشرون بالجنة…..” و هذا ما نشره:

“الإخوة في التيار الديمقراطي شبيكم؟ يكون منكم العقل! ما هذا؟؟

صدقا، مع كل يوم يمر، تتنهضضون! أ هذه هي السلطة إذا !!

مررتم بفساد جماعتنا تجاوزات و إجتهادات و فساد الأخرين: فساد.
ممولونا راس مال وطني، ممولوا الأخرين فاسدون.

وصلتم، أحنا الباهين و الأخرين خايبين و أي واحد يرى أو يشير او يثبت عكس ذلك، هو مأجور و باعثينو و مخلصينه! أحنا الخير المطلق و الي معانا باهين و الأخرين أشرار

مؤسف، 12 قضية ضد حكومة يوسف الشاهد، عمره ما جاء واحد منهم قلي، انت تعمل هكة، باش تفك ناخبي تحيا!

مؤسف، زوز قضايا ضد أنور معروف، ما جانيش نهضاوي قلي تحب تفك ناخبي النهضة و مخلصك فلان.

صحيح هوما خير منكم في هذه، لكن في بقية الإنحطاط، متع بايع دم بوك، كمال اللطيف، إرهابي، داعشي، الحق عندكم ما تقولوا في أرواحكم : تصرف ذبابي باراشوكي رفيع!

شنوة الي ما فهمتوهش؟ ما فهمتوش إنكم حزب حاكم؟ إنكم حزب رئيس الحكومة؟ انه هذيكا خدمة النائب، التركيز مع الحزب الحاكم، مهما كان رئيس الحكومة و أنه لا مؤامرة في ذلك!

يا إنتوما ماكمش متع حكم، ما نجمتوش تستوعبوا الموضوع، يا الي يحكم، يفسد!

بالحق مؤسف جدا!!

رغم الإنحطاط و التلوث و الوسخ و قلة الأدب و التهجم الشخصي و حتى على عائلتي، حاولت ديما نترفع، و نمسحها في قواعد منفلتة مصدومة موش مصدقة بعد خطاب الطهورية أنكم حزب، فقط مجرد حزب، إجتهاد بشري، ماكمش المبشرون بالجنة!

شبيك ما جبدتش فساد النهضة أضحكني هذا جدا!

باهي هاكم 20 نائب و 40 في الكتلة، و عندكم 3 وزراء و رئيس حكومة و كل الهيآت الرقابية، قداش لقيتو من دوسي فساد للنهضة؟ لرجال أعمالها؟ هاو وزنكم 1000 مرة أكثر من وزني و عندكم إمكانيات لا تقارن بإمكانياتي!

ذنبي أنا إنهم كان سرقوا، عرفوا يسرقوا، و انتوما بهايم ما عرفتوش!! فيسع حصلتوا؟

باهي، موافق، ما خرجتلهمش ملفات، خاطر هوما مخلصيني! يجوز
ياخي أنا نائب و نوابكم لا؟ و إلا مخلصهم البحيري زادة؟
و عبو؟ مخلصه البحيري زادة!؟ باهي الشواشي؟

و الله حاولت! عندكم فكرة على عدد الأسئلة الكتابية الي وجهتها لوزراء حكومتكم، نحاول نبحث و نتقصى و نلوج على إخلالات و تجاوزات و فساد و طفاو عليها وزرتكم الضو في مخالفة للقانون و في تصرف كنتوا تنددوا بيه إنتوما قبل؟ قرابة 500!

ملف مارسك؟ 7 محامين، كل واحد يقول فك عليا، توة عند المحامي الثامن! الله غالب ما يكرديلنا حد و هذاكا حد إمكانياتنا، أحنا حركة شابة قايمة على جهود ناس متطوعة!

نجيو لما حدث اليوم، و الي لزني إني أتكلم هكذا!

و الله، و الله العظيم أتفهم وجعكم و حيرتكم و تخبطكم، نائب وحده، ببعض النقرات، حطم كل أساطيركم، الفساد، الرقابة، تطبيق القانون، تمويل الأحزاب، و اظهركم كما أنتم : لستم ملائكة و لا أنبياء، مجرد عباد، شعاراتها ماعون صنعة و ككل التنظيمات البشرية، فيكم الباهي و الخايب، لا أكثر.

أعلم حجم الصدمة و أتفهم عملية الإنكار، أفهم إنكم تراجعوا رواحكم صعيب و متعب، الأسهل مهاجمتي بطرق قذرة، كانوا يهاجموا فيكم بيها.

تقبلت ذلك و سايست، و عملت فصل تام بين السياسي و الشخصي، الموضوعي و الذاتي!

و الله متضامن معاكم! ريحة الحكم يحبلكم سنوات باش تعاودو تراوها، فلإرضاء غروركم و تسكين وجعكم، أسهللكم تصوير الأمر بعقل مؤامراتي سخيف! لم تقدروا على دحض أي حجة، فتجدون عزاء في مهاجمة الشخص و أهله و عرضه.

موش مشكل، تعملوا هكة و تحكيو على أخلقة السياسة! جات في هذه هي؟ حكيتو على محاربة الفساد و بعد بيضتوه!

لكن، موش كايني كثرتوا شوية؟ انحدرتوا برشة؟ تحبوا تحولوا الأمر شخصي، معادش نائب معارض يخدم في خدمته ضد حزب رئيس الحكومة؟ تحب نحكي معاكم بمنطق جربه الباراشوك قبل و لن تستطيعوا معه صبرا؟

في الرائد الرسمي خرجت قائمة متع تعيينات في وزارة غازي الشواشي.

أسابيع لتالي، كان صوتكم مرتفع، صراخا و ضربا على الطاولة، لما كان وزراء الشاهد و النهضة يقومون بنفس الشيء.

كان هؤلاء يبررون بنفس تبريركم اليوم، لم يقنعني و يقنعكم أمس، و أصبح يقنعكم اليوم ! ربما تعتقدون أن الشواشي نبي منزه، آسف لا أراه كذلك، أراه بشر، غالط التوانسة قبل!

نسيتو إنه خرج يطبل للروحه بالتسوية مع مروان مبروك، الي طلعت ما ثماش؟

هل قدمنا إتهامات جزائية؟ لا حبيبي! الإتهامات و الجزم و القطع و حطان الناس في الحبس، هذاكا إختصاص سابق للزميلة سامية و أمينكم العام!

منشور الصباح، كان إتهام سياسي واضح، وجهته و سأوجهه لكل تعيينات تقوم بها حكومة تصريف أعمال (ما كانتش المسارات المهنية تستنى جمعة، يجي الوزير الجديد!).

و لو كان عندنا انه تلك التسميات فيها من لا يستحق لعلاقة قربه من حزب الوزير، لتحولنا إلى القضاء على معنى الفصل 96 و تعرفونا ما نحشموش (اليوم العشية تتأكدون).

و ليطمئن قلبي و قلوبكم، سأطلب من الوزير المقبل مهمة رقابة، للتثبت من كل التعينات منذ سقوط حكومتكم الساقطة.

و رغم أني عمري ما أكدت إنه أحد أقارب قياديكم من المشمولين بالترقيات، فقط سألت هل لهم علاقة قرابة و رغم أني مسؤول على ما أكتب لا على التأويلات، فإني أعتذر إعتذارا صريحا مباشرا لا لبس فيه من كل قيادي سألت إن كان له قريب ترقى و هو ما عندوش.

أحنا وصلنا نعتذر و لا نكابر، موش على ما نكتب، بل حتى على ما تفهمون

لن نطلب منكم الإعتذار على حجم السب و المغالطات في حقنا، اليوم بعد ما أحال محمد عبو الفخفاخ للنيابة العمومية (ما أحالش متع الكمامات، خاطر حكومته و فازات، و أحال الفخفاخ نهار قبل تصويت الحكومة، فالفساد كيما قاعدين تراو ماهو كان مجرد وسيلة لا أكثر).

لن نطلب منكم حتى تصليح أو تصويب، هذه أمور صعيبة و ماكمش أمل و عمل!

مؤسف حقيقة، أنتم بربع حجم نهضة 2011 و تمارسون نفس ممارساتها : دوسيات، تنزيه لأرواحكم، ممنوع نقدكم، عقل مؤامراتي، تبييض للفساد، أنصار قليلة تربية منفلتة، هجومات تحت الحزام و تهديد لمعارضيكم!

على كل، هذه رسالة، إن شاء الله توصل، و خوذوا معاها نصيحة : ما تستعملوش كل قلة تربيتكم و حقدكم و مرارتكم و صدمتكم على حكاية تعيينات الشواشي، دعوا منها قليلا لمبعد : قضية جزائية، من الناس المجبودة، غازي الشواشي و كيف العادة، مع المؤيدات.

الرسالة المقبلة، ستكون بلهجة أخرى، نرى أن بيناتنا خلاف سياسي صحي عادي بين من يحكم و من يعارض، لكن صبيانياتكم تحول كل الخلافات إلى عداوات، إن كان هذا ما تريدون، فليكن!

مع خالص مودة فريق نزع الريش لأمل و عمل.”

شارك رأيك

Your email address will not be published.

error: لا يمكن نسخ هذا المحتوى.