في تدوينة نشرها اليوم الاربعاء 29 جويلية 2020 على صفحته بالفايسبوك سامي بن سلامة يطالب بإعادة درع حنبعل إلى متحف سلقطة الذي أخذ منه في عهد حكومة الترويكا (2011- 2013). و في ما يلي نص التدوينة…
مانيش باش نهبط تصويرة جديدة من سلقطة اليوم…
لكن باش نحكيلكم على درع حنبعل الي كانت نسخة منو موجودة في متحف سلقطة… وتم استعارتو من المتحف من طرف وزارة الثقافة في عهد الترويكا (2011- 2013)… على أساس باش يهزوه لمعرض أثري في إسبانيا ويرجعوه مباشرة من بعد…
الدرع ما رجعش لليوم… الدرع هذا ملك لتونس الكل… لكنو ملك لمتحف سلقطة ويلزمو يرجع…
أحنا نطالبوا من وزيرة الثقافة أولا فتح تحقيق في الموضوع… باش نعرفو رجع لتونس وإلا… وثانيا نطلبوا منها ارجاعو فورا إلى مكانو الأصلي… في متحف سلقطة…
وبناء على حصولي على نسخة وثيقة رسمية تثبت عملية النقل لإسبانيا… فإنها تولي عندي شكوك متعلقة بالاستيلاء على النسخة الأصلية الي في باردو وتعويضها بنسخة سلقطة للتغطية…
الدرع الأصلي للمقاتل القرطاجني والمعروف بدرع حنبعل والذي تم اكتشافه بقصور الساف كان محفوظا على الدوام بمتحف باردو… و لكن هنالك نسخة متقنة منه كانت بمتحف سلقطة… وهذه النسخة هي التي اختفت إذ تم انتزاعها زمن الترويكا من المتحف وبقي مصيرها مجهولا إلى اليوم…
* عضو سابق في الهيئة العليا المستقلة للانتخابات.
شارك رأيك