الرئيسية » أم زياد: استغرب رفاقي العلمانيين الذين يعتبرون رؤوف بالطبيّب إسلامياً

أم زياد: استغرب رفاقي العلمانيين الذين يعتبرون رؤوف بالطبيّب إسلامياً

انتقدت الناشطة الحقوقية نزيهة رجيبة الحملة التي تطال صديقها رؤوف بالطبيّب على اثر تداول خبر تعيينه مديرا لديوان الرئيس المنتخب قيس سعيد ، معتبرةً أن نفس هؤلاء لم يعترضوا في السابق عن تعيين بن نتيشة في قصر قرطاج.

وكتبت في تدوينتها:

” انا عندي صديق نعزو برشه لاخلاقو واستقامتو وال esprit large متاعو .. اي والله كيما نحكيلكم :صديقي رؤوف بالطبيّب فيه هاالصفات الباهية الكل واكثر…. من سنين نحكي معاه ونقهوجو ونتناقشو ونتبادلو الآراء و بعض المعلومات ونخليه يقهقه بالصوت كي يسمع هبلاتي….. ومع هذا السيد غلطني وما فقت بحقيقتو الاسلامويداعشية ..الا امس بمناسبة خبر تعيينو مدير ديوان قيس سعيد……احنا صحاب على الفيسبوك لكن عمري ما دخلت بروفيلو باش نكتشف اللي اكتشفوه امس اصدقائي العلمانيين …..خنار كبير …السيد يبرتاجي في حوايج تقشعر من تطرفها الأبدان….ادعية ومحاضرات دينية…….واللطف اللطف يا وخيتي تصاور ضد المجاهد الاكبر وفيدوات العايق لطفي العبدلي وهو يهاجم في بعض الإعلاميين ويفرك فيهم على انصار نبيل القروي…..ومع هاالسخط الكل سي قيس راجل اشراف يحب يعينو في القصر اللي كان فيه بن نتيشة et consort…..وهذوما كيما نعرفو الالهة متاع الكفاءة و اخلاق الحداثة…لا تكمبين ولا مؤارات ولا مكائد متاع القصور ….ولا غدر بصاحب القصر بيدو
شفتو المهف؟!! خدعني وعداها عليا انا العلمانية الكبيرة(في العمدر ما تخافوش😊) وخبى لحيتو الخوانجية ورا سوريتو السينيي والجيليا اللي راميها على كتافو وكمامها تدلدل على صدرو؟؟؟؟؟!!! جاب ربي فيقوني بيه رفاقي العلمانيين وفي مقدمتهم ابن العم شقيق وزير السياحة اللي عمرو ما مشى للغريبة ولا حط على راسو kippa
شوف سيدي انا ما نحبش نقول شنوه رأي رؤوف في الإسلام السياسي لانو هو اولى بالتعبير على وجهة نظرو….وكونو قيس سعيد يسميه مدير ديوان والا شاف كوجيني….هذا آخر همي ……انما اللي حرق شعيري هي سمعة عايلتي العلمانية اللي نتمناهم ما يكونوش في قطيعة مع هاالشعب الكريم وما يعملوش عليه محاكم تفتيش وخاصة مايظلموهش ولمجرد مظهر ديني في شخصيتو يعملو عليه حظر ويحطولو في وسطو حزام ناسف لا يوجد الا في اوهامهم ورهابهم وفرط مخاوفهم اللي نتفهم بعضها اما موش لها الحد

انا نكره الظلم ونساند كل مظلوم مساندة كاملة وغير مشروطة الا اذا تبين انو خان الوطن او خالف القانون والاخلاق المتواضع عليها.

شارك رأيك

Your email address will not be published.

error: لا يمكن نسخ هذا المحتوى.