بدون ماكياج او ريتوش و امام تذبذب المواقف تجاه الاحزاب والمرشحين من كل صوب يمينا و شمالا و وسطيا و متطرفا سواء في الانتخابات الرئاسية والتشريعية، ابدت امراة المسرح الشهيرة ليلى طوبال عن موقفها بعد سردها لما حدث منذ قرابة 9 سنوات عجاف مع تحليل نابع من الواقع و مع وضع عدة تساؤلات على الطاولة.
هذا ما كتبته اليوم الاثنين 30 سبتمبر ليلى طوبال في تدوينة نشرتها على صفحتها الرسمية بالفايسبوك و تونس تعيش فقرة رمادية من تارخها متارجحة بين هذا و ذاك و كل يجذب الى ناحيته بشتى الوسائل منها التلاعب بالقيم والغدر والمآسي والكل … غير عابىء بما ستؤول اليه البلاد باجواءها المشحونة و امام طريق الى المجهول:
” صباح الخير
الغرفة السوداء والجهاز السرّي لحركة النهضة… هات نعملوا نظرة لتسعة سنين لتالي:
ـ في 2011 تحالفت النهضة مع التكتل والمؤتمر: مصطفى بن جعفر رئيس المجلس التأسيسي ومنصف المرزوقي رئيس الجمهورية المؤقت. المصايب الّي صارت والّي نعرفوها وعشناها قادتها النهضة… وحلفاءها آش عملوا باش يمنّعوا البلاد؟؟؟ حتى شيّ … المتفرّج ما عندوش صفة… عندو حلّين يا يصفّق يا يغادر القاعة إذا ما عجبوش العرض… آما الكرسي كان مرتاح وبنين واهم ببرشه مالعرض … أهاوكة فتّكم بالهدرة سي الزيبدي كان وزير دفاع… أول حاجة قالولو الّي المسيرة السلفية الجهادية لسفارة أمريكيا سلمية وثاني حاجة قعد يستنى في بيروه حتى جاه الخبر الّي فمّة موتى ومجاريح والثالث حاجة نساها وتفكّرها كي رشّحوه للانتخابات الرئاسية :كان باش يبعث زوز دبابات باش يمنع انعقاد اجتماع مجلس نواب الشعب…
ـ أوت 2013 الشعب يريد اسقاط النظام … سقطت النهضة ورحلت اضطرارا وليس اختيارا كيما حبّوا يسوقولها…
ـ انتخابات 2014… نبيل القروي الخاطبة والراغبة في بنت الحسب والنسب… وصار اجتماع باريس بين الشيخين وهذاكة خطب واذاكة قبل وسليم الرياحي زغرط عالعرايس…
2014 يعني عام بعد الاغتيالات … التقيا الخطّان المتوازيان وعنّقوا وباسوا بعضهم وعملوا القباحة ونبيل القروي على ماهو فرحان بالعرس قال على سيدو الشيخ “عرفتو من قريب واكتشفت إنو وطني وعندو مصداقية” ولا يرحم من مات في 2013… وعلى ما تضرب فيه وفي وطنيتو… قدّمو للتوانسة في قناة العايلة بمناسبة خروج الشيخ من قشرتو الخوانجية ودخولو في ثوب الفرارية … وكم كانت دهشة المشاهدات والمشاهدين وقتلي شافوا الشيخ لابس كرافات وبرشه داخوا وهزّوهم للاستعجالي من شدّة الغبطة الّي الشيخ نزع القميص الرمادي والعراقية الاخوانية واعتنق دين التقدّمية والحداثية والديمقراطية…
ـ 2014 والائتلاف الحاكم… بربّي ما تلوموش عليهم أحزاب الائتلاف وأخصّ بالذكر ياسين براهيم… غلطوه هو زادة… ما في بالوش الّي النهضة متاع 2014 هي النهضة متاع 2011 و 2012 و2013… خذى مدّة يثبّت ويدقّق… زعمة يا ربّي هوما متاع الثلاثة السنين السوداء… موش هوما… هوما موش هوما… طلعوا هوما… ياخي يرحم والدين ولديه إسترجل وخرج… وحتى سي نبيل استرجل بل اكثر من هكّة … ما عملش كيما ياسين وحفوظ والّي معاهم والّي حبّوا يفبركوا رئيس… سي نبيل يحب يولّي رئيس باش يحكم في والدينا وولدين والدينا…
من 2011 لليوم قدّاش من سياسي حط يدّو في يدّ النهضة… بخلاف الصالونات والقعدات الّي جمعتوا بعباد طالبين الرضى والنور … والصبايا الحور… وينهم النواب الي سافروا لسوريا وجابوا ملفات تسفير الشباب…وينهم ملفات 4 ديسمبر و9 أفريل… وينهم الأرقام الّي ريقنا شاح واحنا نطلبوا فيهم باش نعرفوا قدّاش كان في خزينة الدولة نهار 14 جانفي 2011 ووين مشات الفلوس وقدّاش مشات منهم للتعويضات … وينهم فلوس الهيبات لتونس… قدّاش مالعفو التخريبي العام دخلوا للوظيفة العمومية والشباب الّي بديبلوماتو يسكسك في القهاوي… علاش فلست الصناديق الاجتماعية… علاش المرفق العمومي من صحّة وتعليم ونقل مشى وطاح مزّانو … ماو خاطر شدّوه عباد ما عندهم حتى كفاءة الا انتماءهم للنهضة وهاذي اكبر كفاءة واهم من كل الشهايد … علاش فلست السياحة وعدينا أعوام عجاف… علاش برك الاقتصاد وفلست البلاد… وعلاش شهر العسل بين العرايس تبلبز… جاوبو وحدّكم
تسعة سنين والنهضة في الحكم الّي صفّق والّي شطح والّي ردح والّي باع والّي خان والّي تكتكت والّي قفّف والّي سكت والّي لحّس والّي باس اليد قبل الراس… أنا لاني بطلة ولاني حتى شي… حاربت كيما قدرت وما زلت باش نحارب وكل يوم تتولد قوّة مالضعف على خاطر حربي على تونس… قلت تكلّمت ورفضت حتى نكون متواجدة معاهم تحت نفس السقف في جميع المناسبات وفي كل المسيرات وبرشه ناس تعرف وشاهدة…
نعاود نقول الّي فمّة عديد التساؤلات… وعديد نقاط الاختلاف الجوهرية مع قيس سعيد… آما اليوم عندي الحق نسأل علاش يلزمني نخاف من قيس سعيّد الّي ساندتو النهضة ومتفرقاتها بعد فوزو في الدور الأول ونعطي الأمان للّي جابها للحكم وباعلنا وطنية الخريجي وعندو علاقات مشبوهة مع الليبي عبد الحكيم بلحاج…
يمكن على خاطر في آخر حلقة باش نطلع دعشوشة وانا في الأصل راقصة كاباريه. “
شارك رأيك