كتب الشاعر محمد الناجح الطرابلسي كلمة وجهها للمترشحين للرئاسية
و في ما يلي نصها:
“موش هجّالة يا همّال
غير انتم ما تجوش رجال
بڨلة للي مخير فيكم
طماعة سالوا رواڨيكم
مَهر الخضرا غالي عليكم
ساحل و فيافي و جبال
قمح ال ما تطوله حفانيكم
تاريخ ال سرده يطوال
ما اسهلها تشدوا الرئاسة
كمشة اماسيخ و كمباصة
الّي هذا يفرك راسه
و يقدم مطلب في الحال
وراس تونس حتى عسّاسه
على باب قصرها محال
واحد جايب ڨفّة معاه
و الثاني حاير في عشاه
ولاخر ڨلصونه ريناه
عامل عركة مع المڨفال
و الرابع عاطي بڨفاه
مطيّح للطرحة السروال
لا تربحكم حاشا ال يسمع
فضحتونا في العالم الاجمع
ساعة ساعة عيني تدمع
عل خضرا و يحير البال
لكن نعرفها ما تركع
حرة و تعفس عل الانذال
موش هجّالة يا همّال
غير انتم ما تجوش رجال”..
شارك رأيك